Dikricher Wäifrënn a.s.b.l.

D’Dikricher Wäifrënn sinn 2025 gegrënnt ginn fir di al Traditioun vum Wäinubau zu Dikrich rëm opliewen ze loossen, an dat no ca. 300 Jar Ënnerbriechung.

D’Virzeechen dofir sinn excellent an Zäite vu Klimawandel, wou generell eng Erhéijung vun den Temperature festgestallt gëtt, di fir d’ Wäiproduktioun vu groussem Virdeel ass. Et ass och bekannt, datt d’Produktiounsgrenz fir de Wäibau sech an de leschten 30 Jar ëm 800km vum Süden an de Norde vun Europa verlagert huet, d.h.: mir hunn 2025 zu Dikrich di selwecht Produktiounsbedingungen wéi 1995 zu Florenz an der Toskana.

D’Dikricher Wäifrënn notze bäim “Revival” vum Wäibau och di neisten technesch a wëssenschaftlech Erkenntnisser op deem Gebidd.

Doriwwer eraus bitt Dikrich mat sengem wäit bekannten “Härebierg” di ideal Viraussetzunge fir en Neistart, an zwar gëtt op dem technesche Plang de volle Südhang, di perfekt Duurchleftung paralell zum Sauerdall, an d’Uleeën vu Miniterrassen fir eng einfach a sécher Bewirtschaftung optimal genotzt.

Um wëssenschaftlechem Plang gëtt voll op d‘PIWI-Zorte gesat, déi di perfekt Viraussetzunge bidde fir eng BIO-Produktioun. 

(PIWI heescht: Pilzwiddertandsfähig Rief-Zorten, d.h. eng bestëmmten Drauwenzort, déi mat enger anerer Riefzort gekräizt – vereedelt- gëtt, an doduerch pilzwidderstandsfähig gëtt)

Véier (4) verschidde Piwi-Zorte sinn ugeplanzt ginn, zwou Rouder an zwou Wäisser. Et ass viirgesinn souwuel wäiss, rosé an roud Wäiner, wéi och wäiss a rosé Crémanten auszebauen.

Véier (4) verschidde Piwi-Zorte sinn ugeplanzt ginn, zwou Rouder (Pinot Nova an Divico) an zwou Wäisser (Johanniter a Souvignier Gris).

D’Dikricher Wäifrënn vermaarten hir Produkter ënner hirem eegene Label BIO+++ (BIO-TRIPLE-PLUS), an dat haaptsächlech wéinst dem Verzicht op Pestiziden.

Den néie Klubb verfollegt nach weider Missiounen an Objektiver, an zwar: 

D’Exploitatioun vun der Wéngertsparzell, déi vun der Stad Dikrich zur Verfügung gestalt an och equipéiert gëtt. Eng eege Konventioun reegelt dëst, genau sou, wéi d’Finanzement vun de Wéngerts/Kellereiaarbichten wärend enger Pilotphas vu 4 Jar. Duerno soll de neie Veräin op eegene Féiss stoen.

Koordinatioun vun deenen eenzelnen Produktiounsphasen resp. de Verkaf vun de Produkten, déi entweeder duerch Eegenleeschtung oder duerch « Outsourcing » u verschidde Partner ofgeséchert sinn.

Den neie Projet “DiWäin” soll och identifikatiouns, touristesch, kulturell, sozial a veräinsiwwergräifend Ziler vun der Stad Dikrich stäerken, an zur harmonescher Entwécklung vun der Nordstad bäidroen, an dat mat externe Partner a Sympathisanten, wéi z.Bsp.: de SI Dikrich, verschidde Schoulen, interesséiert Veräiner, asw.

Duerch Konventioune, wärend der Pilotphas vu 4 Jar, an doriwwer eraus, gëtt Gaart an Heem, Dikrich mat de Wéngertsaarbichten betraut, e Privatwënzer mat der Vinifikatioun chargéiert, an un "Al Dikkrich" gëtt d’Promotioun an de Verkaf vun de Produkter "outgesourced".